كلمات كتير ملهاش مقابل مباشر بالعربي للأسف. عشان نترجمها محتاجين نفكها:
Anthropomorphism
بتتكون من
Anthropos = إنسان
Morphism = هيئة أو شكل
ببساطة مصطلح “أنثروبومورفيزم” معناه أنسنة الله. والأنسنة في السياق دا بالذات بتحمل دلالة سلبية.
يعني ايه؟ يعني انت بتتخيل الله وكأنه إنسان زيك بيغضب ويفرح ويتضايق ويتبسط ويتنطط؛ إنسان زيك بالظبط بس كبير شوية، أو هو الإنسان الأكبر لو جاز التعبير. إله على صورتك ومثالك!، بدل ما تكون انت اللي بتحاول تتحول لمثاله بالاتحاد بيه.
والأنثروبومورفيزم أنواع كتير. أغلب التصورات الشعبية عن الله هي محض أنثروبومورفيزم. زي تصور الله انه هيغضب عليك لو أخطأت وهيعاقبك وهيعمل ويسوي فيك. كل دي خبرات إنسانية مشوهة انسحبت على تصورنا عن الألوهة ولطخته.
وفيه أنثروبومورفيزم من نوع تاني خالص؛ نوع كيوت شوية. زي اللي بيتخيلوا ربنا هو وبيضحكلهم وحاسس بيهم وبيحضنهم. كإن الله زينا حالته النفسية بتتغير من لحظة للحظة. مجرد التفكير في الله بكونه كيان عاطفي نفساني هو أنثروبومورفيزم
وعموما كل تصورات الإنسان عن الله متقدرش تُحيط بالله في ذاته. كلها درجات من الأنثروبومورفيزم. والطريق لمعرفة الله مش بتخيله أو التفكير فيه. لكن الطريق بيبدأ من تنقية الذهن من كل التصورات دي؛ الوحش منها والكويس. كل تصور عن الله بيحجب الله في حقيقته. لا يوجد طريق لله إلا بالاتحاد به وإشراق نوره في قلب الإنسان. ساعتها معرفة الإنسان بالله بتبقى جزء من كيانه مش مجرد فكرة أو صورة أو خيال في دماغه.
